/ᑕᒪᑦᓱᒧᖓ
ᑕᒪᑦᓱᒧᖓ 2018-05-23T01:03:42+00:00

ᑕᒪᑦᓱᒧᖓ

ᐱᒋᐊᖕᖓᓂᕗᓐᓄᑦ –

ᑖᒃᑯᐊ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ (ᔦᒥᔅᐯᑉ ᐊᖏᖃᑎᒌᓐᓂᖓᑦ) ᐊᑎᓕᐅᕐᑕᐅᑐᐊᕐᒪᑦ 1975-ᒥ ᓄᓇᕕᒻᒥᐅᑦ ᓯᕗᓪᓕᐸᐅᑦᓱᑎᒃ ᑖᒃᑯᓇᖕᖓᑦ ᓯᑕᒪᓂᑦ ᐃᓄᐃᑦ ᓄᓇᖃᕐᕕᖏᓐᓂᑦ ᐊᑎᓕᐅᓚᐅᕐᓯᒪᔪᑦ ᐅᓪᓗᒥᓂᑕᕐᒥᒃ ᓄᓇᑖᕐᓂᒧᑦ ᐊᖏᖃᑎᒌᒍᑎᒻᒪᕆᒻᒥᒃ. ᒪᑭᕝᕕᑯᑦ ᓄᐃᑕᓚᐅᕐᓯᒪᔪᑦ ᑕᒣᑎᒍᑦ ᑲᔪᓯᑎᑦᓯᔨᐅᓂᐊᕐᑎᓗᒍ ᐊᖏᖃᑎᒌᓐᓂᒥᒃ ᐊᒻᒪᓗ ᐅᑎᕐᑐᓴᓕᐅᕈᑎᖃᕐᓗᓂ ᐊᑭᓕᕐᑕᐅᒍᑎᓄᑦ ᑮᓇᐅᔭᖁᑎᖏᓐᓂᒃ. ᑖᒃᑯᐊ ᐊᓯᖏᑦ ᐱᖓᓱᑦ ᐃᓄᓐᓄᑦ ᓄᓇᓕᖃᕐᕕᐅᒥᔪᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᖃᖃᑦᑕᓯᓚᐅᔪᑦ ᑭᖑᓂᐊᒍᑦ – ᐃᓅᕕᐊᓗᒻᒥᐅᑦ 1984-ᒥ, ᓄᓇᕘᕐᒥᐅᑦ 1993-ᒥ, ᐊᒻᒪᓗ ᓄᓇᑦᓯᐊᕘᕐᒥᐅᑦ 2005-ᒥ. ᑖᒃᑯᐊ ᐃᓗᓐᓇᑎᒃ ᓄᐃᑦᓯᓯᒪᔪᑦ ᐃᒻᒥᒎᕐᑐᓂᒃ “ᐱᕙᓪᓕᐊᑎᑦᓯᔩᑦ ᑎᒥᖁᑎᖏᓐᓂᒃ” ᐃᓚᒋᔭᐅᑎᓪᓗᒋᑦ ᑖᒃᑯᐊ ᓄᓇᑖᕐᓂᒧᑦ ᑎᒥᖁᑎᖏᓐᓂᒃ ᐊᑎᓕᐅᕆᓕᑐᐊᕋᒥᒃ ᓄᓇᑖᕐᓂᒧᑦ ᐊᖏᖃᑎᒌᒍᑎᒥᓂᒃ. ᓄᐃᑕᐅᓚᐅᕐᑎᓗᒍ ᑖᓐᓇ ᓄᕝᕕᑎ ᐱᕙᓪᓕᐊᑎᑦᓯᔩᑦ ᑎᒥᖁᑎᖓᓂᒃ 2017-ᒥ, ᒪᑭᕝᕕᑯᑦ ᐊᑑᑎᒋᐊᓯᓚᐅᕐᒥᔪᑦ ᐃᓚᐅᑎᑕᐅᖃᑦᑕᓚᖓᒍᓐᓀᑎᓗᒋᑦ ᐃᓄᐃᑦ ᐱᓂᐊᕐᓂᓕᕆᓂᕐᑎᒍᑦ ᑭᒡᒐᑐᕐᑕᐅᓂᖏᓐᓂᒃ, ᐱᔅᓇᓯᒥᒃ ᑲᒪᒋᔭᑐᐊᖃᓯᓂᐊᕐᑐᒥᒃ.

ᐅᑦᑑᐱᕆ 2016-ᒥ, ᒪᑭᕝᕕᐅᑉ ᑲᑎᒪᔨᖏᑦ ᓄᐃᑦᓯᓚᐅᔪᕗᑦ “ᑐᖕᖓᕕᓐᓂᒃ ᕿᒥᕐᕈᔩᑦ ᑲᑎᒪᔨᐊᐱᖏᓐᓂᒃ” ᕿᒥᕐᕈᓂᐊᕐᑎᓗᒋᑦ ᐃᒣᓕᒋᐊᖁᔨᓗᑎᓪᓗ ᐱᐅᓯᓕᐅᒥᑎᑦᓯᒍᑎᐅᓂᐊᕐᑐᓂᒃ ᑎᒥᐊᕈᖁᑎᖏᑦᑕᓗ ᑲᑐᑦᔮᖏᑦᑕᓗ ᐱᔅᓇᓯᑎᒍᑦ ᐊᐅᓚᑕᖏᓐᓂᒃ ᐊᒻᒪᓗ ᐱᐅᓯᓕᐅᒥᑎᑦᓯᒥᓗᑎᒃ ᓄᑖᓂᒃ ᐱᔅᓇᓯᓂᒃ ᐱᕕᑦᓴᖃᕈᓐᓇᓂᕐᒥᓂᒃ. ᑖᒃᑯᐊ ᑲᑎᒪᔨᐊᐲᑦ ᑐᓴᕐᑎᓯᓕᓚᐅᔪᕗᑦ ᒪᑭᕝᕕᐅᑉ ᑲᑎᒪᔨᖏᓐᓂᒃ ᕕᕗᐊᕆ 2017-ᒥ ᒪᑭᕝᕕᑯᓂᒃ ᓄᐃᑦᓯᖁᔨᑦᓱᑎᒃ ᐃᒻᒥᒍᕐᑐᒥᒃ ᐱᔅᓇᓯᓕᕆᔨᐅᓂᐊᕐᑐᒥᒃ ᑎᒍᒥᐊᒐᔭᕐᑎᓗᒋᑦ ᐃᓗᓐᓇᖏᓐᓂᒃ ᓂᕈᐊᕈᑎᐅᒍᓐᓇᑐᓂᒃ ᑐᖕᖓᕕᒋᔭᐅᔪᓂᒃ ᒪᑭᕝᕕᑯᑦ ᐃᓗᓐᓈᒍᑦ ᓇᒻᒥᓂᕆᔭᐅᔪᓄᑦ ᑎᒥᐊᕈᖁᑎᖏᓐᓄᑦ ᐊᒻᒪᓗ ᓄᑭᖃᕈᓐᓇᓗᑎᒃ ᑭᒡᒐᑐᕈᓐᓇᓂᕐᒥᒃ ᒪᑭᕝᕕᑯᓂᒃ ᐃᓗᓐᓈᒍᑦ ᓇᒻᒥᓂᕆᔭᐅᓂᖃᖕᖏᑐᓄᑦ ᑎᒥᐊᕈᕐᓄᑦ ᑲᑐᑦᔮᓄᓪᓗ. ᑌᒣᒻᒪᑦ, ᕕᕗᐊᕆ 2017-ᒥ ᒪᑭᕝᕕᑯᑦ ᑐᓴᕐᑎᓯᓕᓚᐅᔪᕗᑦ ᓄᐃᑦᓯᓚᖓᓕᕆᐊᒥᓂᒃ ᓄᑖᒥᒃ ᐱᔅᓇᓯᒥ ᐱᕙᓪᓕᐊᑎᑦᓯᒐᓱᐊᕐᑎᒥᒃ ᑎᒥᒥᒃ.

ᑕᒪᓐᓇ ᓄᐃᑦᓯᓂᐅᔪᖅ ᐃᓄᓐᓄᑦ ᓇᒻᒥᓂᕆᔭᕐᒥᒃ “ᐱᕙᓪᓕᐊᑎᑦᓯᔩᑦ ᑎᒥᖁᑎᖓᓂᒃ” ᐃᓗᓐᓈᒍᑦ ᓇᒻᒥᓂᕆᔭᕐᒥ ᒪᑭᕝᕕᑯᓄᑦ, ᓇᒻᒪᓈᕐᓂᖃᕋᔭᕐᑐᖅ ᑖᒃᑯᓄᖓ ᐱᓂᐊᕐᓂᓕᕆᓂᕐᑎᒍᑦ ᐱᔅᓇᓯᑎᒍᓪᓗ ᖃᓄᐃᓕᖓᒍᑕᐅᕙᑦᑐᓂᒃ ᑖᒃᑯᓄᖓ ᐱᖓᓱᐃᓄᑦ ᐊᓯᖏᓐᓄᑦ ᐃᓄᐃᑦ ᓄᓇᑖᕋᓱᐊᕐᑎᖏᑦᑕ ᓄᓇᖁᑎᖏᓐᓄᑦ ᑲᓇᑕᒥ. ᑖᒃᑯᐊ ᐃᓅᕕᐊᓗᐃᑦ “ᐃᓅᕕᐊᓗᐃᑦ ᐱᕙᓪᓕᐊᑎᑦᓯᔨᖏᑦᑕ ᑎᒥᖁᑎᓖᑦ”, ᓄᓇᕘᕐᒥᐅᑦ “ᓄᓇᓯ ᑯᐊᐳᕇᓴᓐ”-ᓖᑦ ᐊᒻᒪᓗ ᓄᓇᑦᓯᐊᕘᕐᒥᐅᑦ ᐃᒣᑦᑐᖃᕐᑎᓗᒋᑦ “ᓄᓇᑦᓯᐊᕗᑦ ᑲᑎᒪᐅᑎᔪᓂᒃ ᑲᒻᐸᓂᖁᑎᖏᑦ”.

ᑌᒪᑦᓭᓇᖅ ᐊᓯᖏᓐᓂ ᐅᑭᐅᕐᑕᑑᑉ ᓄᓇᓕᖃᕐᕕᖏᓐᓂ ᑌᒣᒻᒥᒪᑦ, ᐃᒻᒥᒍᕐᑐᒥᒃ ᐱᔅᓇᓯᓕᕆᔨᐅᓂᕐᒧᑦ ᑮᓇᐅᔭᓕᐅᕐᑎᐅᒐᓱᐊᕐᑐᒥᒃ ᐃᒻᒥᒍᕐᑐᒥᒃ ᒪᑭᕝᕕᑯᓂ ᓯᕗᓂᖃᕐᑎᑕᐅᕗᖅ ᐱᐅᓯᓕᐅᒥᑎᑕᐅᔪᖃᕐᓂᐊᑎᓪᓗᒍ ᑐᑭᑖᕆᒍᓯᕐᒥᒃ ᐱᐅᓯᓕᐅᒥᑎᑦᓯᒍᑕᐅᓗᓂᓗ ᒪᑭᕝᕕᑯᑦ ᐱᔅᓇᓯᒥᒃ ᐱᕕᑦᓴᖃᕈᓐᓇᓂᕐᒥᓂᒃ.

ᓄᕝᕕᑎ ᐱᕙᓪᓕᐊᑎᑦᓯᔩᑦ ᑎᒥᖁᑎᖓᑕ ᓄᐃᑕᐅᓚᐅᕐᓂᖓ ᓄᐃᑦᓯᒍᑎᐅᓚᐅᕐᒥᔪᖅ ᓄᑖᓂᒃ ᑲᑎᒪᔨᑦ ᐃᓂᖏᓐᓂᒃ ᓄᕝᕕᑎᐅᑉ ᑲᑎᒪᔨᒋᓂᐊᓕᕐᑕᖏᓐᓂᒃ ᐊᒻᒪᓗ ᑲᑎᒪᔨᒋᔭᐅᓂᐊᓕᕐᑐᓂᒃ ᒪᑭᕝᕕᑯᓄᑦ ᒪᕐᕈᐃᓂᒃ ᑎᒥᐊᕈᖁᑎᖏᓐᓄᑦ ᐃᓄᐃᑦ ᖃᖓᑦᑕᔫᖏᓐᓄᓗ ᕗᔅᑦ ᐃᐊᒃᑯᓄᓪᓗ – ᐃᒣᓕᖓᓂᖃᓕᕐᑎᓗᒋᑦ:

ᒪᑭᕝᕕᐅᑉ ᑲᑎᒪᔨᖏᑦ ᑲᒪᒋᔭᖃᕆᐊᓕᑦ ᑎᓕᔨᓗᑎᒃ ᐱᖓᓲᔪᕐᑐᓂᒃ ᓄᕝᕕᑎ ᐱᕙᓪᓕᐊᑎᑦᓯᔩᑦ ᑎᒥᖁᑎᖓᑕ ᑲᑎᒪᔨᖏᓐᓂᒃ ᒪᓕᓪᓗᒋᑦ ᐃᓱᒪᒋᔭᐅᓯᒪᒋᐊᓖᑦ, ᐊᒻᒪᓗ ᐃᒣᓕᒋᐊᖁᔨᓗᑎᒃ ᑕᒪᑦᓱᒧᖓ ᐱᖓᓱᓄᑦ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᒧᑦ ᐃᓚᐅᔪᓄᑦ ᑎᓕᔭᐅᔪᓂᒃ ᕘᔅᑦ ᐃᐊᒃᑯᓗ ᐃᓄᐃᑦ ᖃᖓᑦᑕᔫᖏᑦᑕᓗ ᑲᑎᒪᔨᖏᓐᓄᑦ.

ᓄᕝᕕᑎᐅᑉ ᑲᑎᒪᔨᖏᑦ ᑲᒪᒋᔭᖃᕆᐊᓖᑦ ᓇᓪᓕᑳᕆᒋᐊᖃᕐᓂᒥᒃ ᑎᓕᔨᒋᐊᖃᕐᓂᒥᓪᓗ ᓄᕝᕕᑎᐅᑉ ᑲᒪᔨᒻᒪᕆᖏᓐᓂᒃ ᐳᕐᑐᓂᕐᓴᓂᒃ; ᐃᑦᓯᕙᖃᑕᐅᓲᖑᓂᐊᕐᑐᓂᒃ ᑲᑎᒪᔨᓄᑦ ᐃᓚᐅᔫᓗᑎᒃ ᑎᒥᐊᕈᓕᒫᑦᓯᐊᓄᑦ ᐊᒻᒪᓗ ᑲᑐᑦᔮᖑᔪᕐᓄᑦ, ᖏᒃᑲᓗᐊᕐᑎᓗᒍ ᑎᒥᐊᕈᒻᒪᕆᐅᓂᕐᓴᓄᑦ ᒪᑯᓄᖓ ᕗᔅᑦ ᐃᐊᒃᑯᓄᓪᓗ ᐃᓄᐃᑦ ᖃᖓᑦᑕᔫᖏᓐᓄᓗ ᒪᓕᓪᓗᒋᑦ ᓄᐃᑕᐅᒪᔪᑦ ᐃᓱᒪᒋᔭᐅᓂᖃᕆᐊᖃᓲᑦ; ᐊᒻᒪᓗ ᓄᕝᕕᑎᒃᑯᑦ ᐊᖓᔪᕐᖄᖓᑦ ᐃᑦᓯᕙᖃᑕᐅᓲᖑᓂᐊᕐᑎᓗᒍ ᓂᕈᐊᕈᓐᓇᖏᑦᑑᓗᓂ ᐃᓚᐅᔫᓗᓂ ᐃᓗᓐᓀᓄᑦ ᑎᒥᐊᕈᐃᑦ ᑲᑎᒪᔨᖏᓐᓄᑦ.

ᑎᒥᐊᕈᐃᑦ ᑲᒻᐸᓂᖏᑦᑕ ᑲᑎᒪᔨᖏᑦ ᑲᒪᒋᔭᖃᕆᐊᓖᑦ ᓇᓪᓕᑳᕆᓂᕐᒥᒃ ᑎᓕᔨᓂᕐᒥᓗ ᑲᒪᔨᒻᒪᕆᑦᓴᓂᒃ ᐳᕐᑐᓂᕐᓴᓂᒃ (ᑲᒪᔨᒻᒪᕆᒻᒥᒃ ᐳᕐᑐᓂᕐᓴᒥᒃ), ᐊᖓᔪᕐᖄᑉ ᑐᖓᓕᑦᓴᖏᓐᓂᒃ ᑮᓇᐅᔭᓕᕆᔨᒻᒪᕆᑦᓴᒥᒃ ᐊᓯᖏᓐᓂᓗ. ᑖᓐᓇ ᐊᖓᔪᕐᖄᖅ ᐊᒻᒪᓗ ᑎᒥᐊᕈᕐᒧᑦ ᐳᕐᑐᓂᕐᓴᕆᔭᐅᔪᖅ ᓄᕝᕕᑎᐅᑉ ᐊᖓᔪᕐᖄᖓᓂᒃ ᑐᓴᐅᒣᓐᓇᑎᑦᓯᓯᐊᓲᖑᒋᐊᓕᒃ ᖃᐅᑕᒫᑦ ᑎᒥᐊᕈᕐᒧᑦ ᐊᐅᓚᑕᐅᓂᖃᕐᑐᓄᑦ.

ᓄᕝᕕᑎᐅᓪᓗ ᕘᔅᑦ ᐃᐊᒃᑯᓗ ᐃᓄᐃᑦ ᖃᖓᑦᑕᔫᖏᑦᑕᓗ ᑲᑎᒪᔨᖏᑦᑕ ᑐᖕᖓᕕᖏᑦ ᐃᒣᓕᖓᓂᖃᕐᒪᑕ:

  • ᐱᖓᓲᑎᓪᓗᒋᑦ ᐊᖏᖃᑎᒌᓐᓂᒧᑦ ᐃᓚᐅᔪᐃᑦ ᐱᔅᓇᓯᓕᕆᓕᓂᐅᔪᓂᒃ, ᐱᓇᓱᑦᑎᒋᔭᐅᖏᑑᑦᓱᑎᒃ ᒪᑭᕝᕕᑯᓄᑦ, ᐃᓚᐅᔫᖃᑕᐅᖏᑑᑦᓱᑎᓪᓘᓃᑦ ᒪᑭᕝᕕᐅᑉ ᑲᑎᒪᔨᖏᓐᓄᑦ.
  • ᐱᖓᓱᓂᒃ ᐃᓄᑑᓈᕐᑎᑐᓂᒃ ᒪᑭᕝᕕᒥᐅᑕᐅᖕᖏᑐᓂᒃ, ᐱᔅᓇᓯᒥᒃ ᐱᓇᓱᐊᒐᖃᖃᑦᑕᓯᒪᔪᓂᒃ ᐊᒻᒪᓗ ᐱᒻᒪᕆᒻᒥᒃ ᐱᓇᓱᐊᒐᖃᖃᑦᑕᓯᒪᔪᓂᒃ, ᐃᓚᐅᔫᖃᑕᐅᒍᓐᓇᑐᒥᒃ ᖏᑦᑐᒥᓪᓘᓃᑦ ᔦᒥᔅᐯᑉ ᐊᖏᖃᑎᒌᓐᓂᖓᓄᑦ.

ᑖᒃᑯᐊ ᓄᑖᑦ ᑲᑎᒪᔨᖏᓐᓄᑦ ᐃᓚᐅᓕᕐᑐᐃᑦ ᑐᓴᕐᑎᓯᒍᑕᐅᓚᐅᔪᕗᑦ ᔫᓂ 26, 2017-ᒥ. ᔫ 27-ᒥ ᐃᓗᓐᓇᑎᒃ ᓄᑖᑦ ᑲᑎᒪᔨᓄᑦ ᐃᓚᐅᔫᓕᕐᑐᐃᑦ ᑲᑎᒪᓂᖃᓚᐅᔪᕗᑦ ᐅᓪᓗᒥᒫᖅ ᑲᑎᓯᖃᑦᑕᑎᑎᑕᐅᑦᓱᑎᒃ ᑲᑎᒪᔨᐅᖃᑎᒋᓕᕐᑕᒥᓂᒃ ᒪᑭᕝᕕᐅᓗ ᐊᖓᔪᕐᖄᒪᕆᖓᓂᒃ ᐳᕐᑐᓂᕐᓴᖏᓐᓂᓗ, ᐊᒻᒪᓗ ᐳᕐᑐᓂᕐᓴᒥᒃ ᑲᒪᔨᒻᒪᕆᒋᔭᐅᔪᓂᒃ ᒪᑭᕝᕕᑯᓄᓪᓗ ᑎᒥᐊᕈᐃᑦ ᑲᒻᐸᓂᖏᓐᓄᓗ. ᐅᖄᔭᐅᔪᖃᓚᐅᔪᕗᖅ ᒪᑭᕝᕕᐅᑉ ᐱᐅᓯᕆᖃᑦᑕᓯᒪᓕᕐᑕᖏᓐᓄᑦ ᐊᑎᓕᐅᕆᓂᕐᒧᓗ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᓂᒃ, ᐊᒻᒪᓗ ᐊᑐᓂᑦ ᒪᑭᕝᕕᐅᑉ ᑎᒥᐊᕈᖁᑎᖏᑦᑕ ᑲᒻᐸᓂᖏᓐᓄᐊᖓᔪᓂᒃ.

ᓄᕝᕕᑎᒃᑯᑦ, ᕘᔅᑦ ᐃᐊᒃᑯᓗ ᐃᓄᐃᑦ ᖃᖓᑦᑕᔫᖏᑦᑕᓗ ᑲᑎᒪᔨᖏᑦ ᓯᕗᓪᓕᐹᒥ ᑲᑎᒪᓂᖃᓚᐅᔪᕗᑦ ᔫᓂ 28, 2017-ᒥ. ᑖᒃᑯᐊ ᓯᕗᓪᓕᐸᐅᑦᔨᒋᐊᖃᓚᐅᔪᕗᑦ ᓇᓪᓕᑳᕆᓂᕐᒥᒃ ᓄᑖᓂᒃ ᑲᑎᒪᔨᒋᔭᐅᓂᐊᓕᕐᑐᓂᒃ ᒪᑭᕝᕕᑯᑦ ᑎᒥᐊᕈᖁᑎᖏᑦᑕ ᑲᒻᐸᓂᖏᓐᓄᑦ ᐊᓯᖏᓐᓄᑦ – ᖃᓪᓗᑎᒃ ᐅᕐᓱᐊᓗᓐᓂᐊᑏᑦ, ᑲᐅᑕᖅ ᓴᓇᔩᑦ, ᓄᓇᕕᒻᒥ ᓄᓇᖕᖑᐊᓕᐅᕐᑏᑦ, ᐊᒻᒪᓗ ᑲᑐᑦᔮᖑᔪᕐᓄᑦ ᐱᓇᓱᐊᕐᑕᐅᔪᓄᑦ ᐅᒥᐊᕐᔪᐊᓕᕆᔨᓄᑦ NEAS-ᑯᓄᑦ, ᐅᓇᖅ ᐃᖃᓗᓐᓂᐊᑎᖏᓐᓄᓗ ᐊᒻᒪᓗ ᑕᕐᖁᑎ ᐃᑯᒪᓕᕆᔨᖏᓐᓄᑦ.

ᑕᑯᓐᓈᑕᑦᑎᓄᑦ:
ᒪᑭᕝᕕᑯᑦ ᐱᕕᖃᕐᑎᓯᓂᐊᕐᑎᓗᒋᑦ ᓄᓇᕕᐅᑉ ᐃᓄᖏᑦᑕ ᑭᖑᕚᕆᓂᐊᕐᑕᖏᓐᓄᑦ.

ᑐᕌᒐᑦᑎᓄᑦ:
ᒪᑭᕝᕕᑯᑦ ᐱᔅᓇᓯᓕᕆᓂᒃᑯᑦ ᐱᔪᑦᓴᐅᔮᕈᑎᖏᑦᑕ ᐱᑦᓯᐊᑕᐅᓂᖏᓐᓄ ᑲᒪᒋᔭᐅᑦᓯᐊᑕᐅᓂᖏᓐᓄᓗ, ᓄᕝᕕᑎᒃᑯᑦ ᓄᖑᐃᓐᓇᑎᑦᓯᑌᓕᒪᓂᖃᕐᓂᐊᑐᑦ ᒪᑭᕝᕕᐅᑉ ᑮᓇᐅᔭᒻᒪᕆᑦᑎᒍᑦ ᐱᖁᑎᒻᒪᕆᖏᓐᓂᒃ ᐱᕙᓪᓕᖁᑎᒋᔭᐅᓂᐊᕐᑐᓂᒃ ᑭᖑᕚᖑᓂᐊᕐᑐᓄᑦ, ᑭᓪᓕᖃᕐᕕᐅᓯᐊᕐᑐᓂᒃ ᐅᒃᑯᐃᖔᑦᓯᐊᓂᖃᕐᑐᓂᓪᓗ.

ᓯᕗᓂᑦᓴᑎᓐᓄᑦ – ᓄᕝᕕᑎᐅᑉ ᓯᕗᓂᑦᓴᖏᑦ ᒪᑯᐊᖑᒻᒪᑕ:

  • ᑲᒪᒋᔭᖃᕐᓗᓂ ᐃᑉᐱᒋᔭᖃᕐᓗᑎᓪᓗ ᒪᑭᕝᕕᑯᑦ ᓄᐃᑕᒌᕐᑐᓂᒃ ᓯᕗᓂᑦᓴᒥᓪᓗ ᐃᓗᓐᓈᒍᑦ ᓇᒻᒥᓂᕆᔭᐅᓂᐊᕐᑐᓂᒃ ᐃᓗᓐᓈᒍᑦ ᓇᒻᒥᓂᕆᔭᐅᓂᖃᖕᖏᑐᓂᓪᓗ ᑎᒥᐊᕈᖏᓐᓂᒃ ᐊᒻᒪᓗ ᑲᑐᑦᔮᖏᓐᓂᒃ.
  • ᓄᐃᑦᓯᓗᓂ, ᑮᓇᐅᔦᕐᕕᖃᕐᓗᓂ, ᐊᐅᓚᑦᓯᓗᓂ ᑲᒪᒋᔭᖃᕐᓗᓂᓗ ᐱᔅᓇᓯᑎᒍᑦ ᑮᓇᐅᔦᕈᑕᐅᒪᔪᓂᒃ ᓇᒻᒪᓈᕐᓯᒪᓂᖃᕐᑐᓄᑦ ᒪᑭᕝᕕᐅᑉ ᑕᑯᓐᓈᑕᖏᓐᓄᓗ ᑐᕌᒐᖏᓐᓄᓗ.
  • ᐱᕕᓕᒫᖓᒍᑦ, ᓴᐳᒻᒥᓗᒋᑦ ᒪᑭᕝᕕᐅᑉ ᑎᓕᔭᐅᒪᒍᑎᖏᑦ ᐱᓇᓱᒐᑦᓴᓕᐅᕐᓂᑯᑦ ᐱᓇᓱᒐᑦᓴᓂᒃ ᐱᕕᑦᓴᖃᕐᑎᓯᓂᒃᑯᓗ ᒪᑭᕝᕕᐅᑉ ᐃᓚᐅᔪᖁᑎᖏᓐᓂᒃ ᓄᓇᕕᐅᑉ ᓄᓇᖓᓂ ᐊᒻᒪᓗᓘᓐᓃᑦ ᐃᑲᔪᕐᓯᓗᓂ ᐱᐅᓯᓕᐅᒥᑎᑦᓯᒐᓱᐊᕐᓂᒥᒃ ᓄᓇᕕᐅᑉ ᓄᓇᓕᖏᓐᓂᒃ ᐅᕝᕙᓘᓐᓃᑦ ᓄᓇᕕᓕᒫᒥᒃ ᐃᓗᓐᓈᒍᑦ.
  • ᐃᑉᐱᒋᔭᖃᕐᓗᓂ ᒪᑭᕝᕕᐅᑉ ᐱᔅᓇᓯᓄᑦ ᑮᓇᐅᔦᕈᑎᒋᓯᒪᔭᓕᒫᖏᑦ ᑲᒪᒋᔭᐅᑦᓯᐊᕋᓗᐊᕐᒪᖓᑕ ᐱᕙᓪᓕᐊᑎᑦᓯᔨᐅᑉ ᑎᒥᖁᑎᖓᓄᑦ ᐱᑦᔪᑎᖃᑦᓯᐊᓂᒃᑯᑦ ᓂᕆᐅᓐᓂᖃᕐᓂᐊᑎᓪᓗᒍ ᖄᖏᕐᓂᑯᓕᐅᕐᓂᒥᒃ ᐊᒻᒪᓗ ᒪᑭᕝᕕᑯᓄᑦ ᐊᕐᕌᒍᑕᒫᑦ ᑮᓇᐅᔭᑐᐃᓐᓇᓂᒃ ᐅᑎᕐᑎᓯᑦᓯᐊᕋᓗᐊᕐᒪᖔᑕ ᑮᓇᐅᔦᕈᑎᒋᓯᒪᔭᖏᓐᓄᑦ.
  • ᐱᒐᓱᐊᕐᓗᓂ ᖄᖏᕐᓂᑯᓕᐅᕈᓐᓇᑐᓂᒃ ᐱᔅᓇᓯᓂᒃ ᓄᓇᕕᐅᑉ ᓄᓇᖓᓂ ᐱᓕᐅᒥᓂᕐᓴᐅᓕᐅᑎᓂᒃᑯᑦ ᐊᒻᒪᓗ ᐊᔪᐃᓐᓇᓂᖃᕐᓗᓂ ᐱᓇᓱᐊᖃᑎᖃᕐᓂᒥᒃ ᑲᑐᑦᔮᖑᔪᕐᓂᒃ ᐃᓚᒋᓗᒋᑦ ᓄᓇᓕᐅᓪᓗ ᓄᓇᓕᓕᒫᓪᓗ ᑮᓇᐅᔭᓕᐅᕋᓱᐊᕐᑎᖏᑦ.

ᐸᕐᓇᓯᒪᔭᑦᑎᓄᑦ

  • ᐱᕈᕐᑎᓯᓂᖅ: ᐊᑦᔨᒋᓕᑎᕆᐊᕐᓗᒋᑦ ᐱᔅᓇᓯᓕᕆᓃᑦ ᐊᒻᒪᓗ ᑮᓇᐅᔦᕈᑎᖃᕐᐸᓃᑦ ᓄᑖᓄᑦ ᐱᔅᓇᓯᓕᕆᐅᑎᓄᑦ ᓄᑖᓂᒃ ᑮᓇᐅᔭᕐᓂᒃ ᓄᐃᑦᓯᓂᐊᕐᑐᓄᑦ ᓄᓇᕕᐅᑉ ᒪᑭᒐᓱᐊᕐᓂᓕᕆᐅᑎᖏᓐᓄᑦ;
  • ᐊᐅᓚᑦᓯᓂᕐᓄᑦ: ᐱᐅᓯᓕᐅᒥᑎᑦᓯᓗᓂ ᖄᖏᕐᓂᑯᓕᐅᕐᓂᒥᒃ ᐅᓄᕐᓯᒋᐊᕆᓂᒃᑯᑦ ᑮᓇᐅᔭᓕᐊᓂᒃ, ᐳᒃᑭᓕᐅᒥᑎᑦᓯᓂᒃᑯᓗ ᑮᓇᐅᔭᕐᑑᑎᓂᒃ ᐊᒻᒪᓗ ᑲᒪᒋᔭᖃᕐᓗᓂ ᑮᓇᐅᔭᑐᐃᓐᓇᐅᓂᖏᓐᓂᒃ;
  • ᑎᒥᐅᔪᖅ: ᑲᒪᒋᓗᒋᑦ ᐊᑐᕐᓂᖃᑦᓯᐊᕈᓐᓇᑐᑦ ᐱᒐᓱᐊᕐᓂᓴᐅᓕᐅᒥᖁᓪᓗᒋᑦ.

ᑲᑎᒪᔨᕗᑦ